Friday, 15 April 2011

Siri 2 : Hari Pertamo Di Kem Komando.

Lopeh abis latihan Den dapat bercuti, kiro-kiro dua minggu laa. Maso cuti abih satu pokan Den round, jumpo kekawan .Macam-macam cerito baru Den tahu pasal kekawan Den yang lamo tak  jumpo, ado yang dah masok polis, ado yg dah masok askar TUDM, ado yang dah poei Kelumpor cari kojo dan ramai jugak yg dah mulo sambong belajar kat universiti. Yang sodehnyo adoo jugo kengkawan Den yg masih duduk kat kampong laie...buat kojo sendiri..dan yang paling sodihnyo ada 2 kekawan Den yang dah kono tangkap masok lokap sobab hisap ganja. Tu laa bahayonya bilo dah tak ado kojo,sonang ajo ikut buek kojo tak senonoh tu..Nasihat Den pado org mudo jgn sekali-kali nak mengata cubo ambil dadah nie....tak sonang hidup kito nanti.....

Lopeh cuti, dan mulo melapor kek Kem Sungai Udang...takberapo jauh dari kampong Den, naik teksi dalam 1 jam, tambangnya dalam 5 ringit ajo. Mulo-mulo masok kem tu ghoron jugak Den, kat pintu dopan tu ada gambar GIMAU, lopeh tu Den perasaan ada papan tando yg ditulih dengan perkataan berikut : "KEDATANGAN MU TAK DIUNDANG, JIKA RAGU-RAGU HARAP PULANG ". Bilo baco ajo papan tando tu, hati Den dah mulo tak sonang, gelisah. Kat pintu balai pengawal Den buek kali pertamo jumpo pengawal Komando. Nampak segak dan garang. Lopeh Den konakan diri , Den dibori masok menuju ke tompek Den melapor......

....bilo Den sampai dan turun ajo dari teksi. jam lobeh kurang pukol 12 lobeh, hari minggu....Den tengok dah ghamai yang menunggu dan ado sorang tu menjorit...Wah senang banyak kau...teksi anta samapai dalam....siap kau !...Bilo dongar ajo bondo tu, Den dah mulo raso. Lopeh  ajo Den turonkan barang-barang Den...ado sorang tu tanya Den, "berapa lama kau dah bercuti ? Jawab Den dua minggu ?...tetibo Den gaso pipi Den berdosing, kono sedas penampa..lopeh tu Den gaso ada penumbok sampai kat hidung Den....masa tu palo Den  mulo tak raso sodap....tau-tau baju Den dah basah dek darah yang keluar kat hidung Den akibat penumbok  tadi. Org yg menampa Den tu kato " Baru dua minggu dah tak pandai nak bercukor ..?Maso tu misai Den baru nak tumbuh, maklumlaa maso kat pusat latihan dulu mano boleh simpan misai. ingek dan tamat dan kojo boleh simpan misai.....Kemudian dia kato "..ini baru salam pengonalan tau..belum abis lagi..."..Maso tu yang aku ingat yg lain cumo tergolak bosa...

Den ingekkan bilo hidung Den dah berdarah tu, dia orang kesiankan Den, ruponya tak. Lopeh tu macam-macam yang Den kono. tak payah lah Den ceritokan semuanyo....nanti org  akan  eksploitasikan dan memanupilasikan cerito Den, jadi isu politik susah jugak Den. Pendek kato, dari maso Den sampai tu, Den pakai baju kemejo...sessi ari tu berhonti sekojap maso maghrib..dan sambong sampai awal pagi esoknya.Torok-mememang torok masa tu, azab memang azab..cumo Den tak sanggup nak cerito semuanyo kat sini sobab takut luko lamo berdarah kembali dan juga tak mahu cerito tu disensasikan oleh org lain untuk tujuan nak menjatohkan kdo. Eekleh Den kato, maso tu memang torok, tapi Den redha sebob Den nak jadi KOMANDO. Walau susah macamano pun Den dah bertekad yang Den akan totap jadi komando. Abih org kampong sumo dah tahu, malu Den kalau tak dapat jadi komando nanti..Tu laa sobabnyo Den harung jugak walaupun susah.

Potang tu dalam jam 5 limo, Den kono berlari keliling kem, maso dio org bori adalah bawah  14 minit, jarak lobeh kurang 2 km lobeh (Den tak berapo pasti..tapi jauh jugak lah). Den pun apolaiee, berlari lah dengan sekoncang-koncangnyo.....takut kalau tak sampai pado maso tu, ntah apo lagi yang Den akan kono...bilo Den lalu kat blok bujang Skn bantuan, Den dah raso ponek sangat, napeh Den dah macam nago maso tu...tibo-tibo Den dongar.." woit...lari laa, mano boleh jalan kat kem komando....nampak langit kono lari.",Maso tu dopen Den ada dua org yang Den tak kona, agakx Den dia org nie Pegawai...sobab tu dia org togo Den. Den toruh jawab, "Maaf Tuan, saya terlampau penah,!". Lopeh tu, ado sorang tu kotok kepalo Den dan kato..."Ingat dalam kem komando, kalau nampak langit, kena berlari, tak leh berjalan, lagi sekali aku nampak kau berjalan siap kau..! Den diam ajo, dio suruh Den push up, 30 kali, lopeh tu baru dia org lopehkan Den...Lopeh sebulan lobih bar u Den tau yang duo  orang tu buakannya pegawai tapi Lkpl ajo...cheech...Den raso tertipu...sodap-sodap ajo dia org kotok kepalo Den dan suruh Den push up lagi...tapi Den tak baleh dondam kat mereko....bilo jumpo Den...dio org yg lari takut Den konokan dia orang pulak...

Bilo Den samapi kat tompek penamat, Den dah terlewat, apo laie...macam-macamlaa yang Den kono, ...bilo Den konang-konangkan, bab tu , golak jugak Den, lobih-lobih lagi bilo part Den kono tangkap5 eko  katak ...maso tu dah nak dooket maghrib, Den dapaek tangkap dua ekor, Den kono simpan dalam pokek Den, sobab tak ada bokeh nak simpan, masok yang ketigo dan keompek, dan masih  boleh pohgang lagi...tangan dah ponoh macamano nak tangkap lagi....? Org yg doro Den tu kato, 'kau masok laa kat mulut kau yg satu tu, baru boleh kau tangkap yg kelimo...nasib-nasib.....Den pun masokkan katak tu kek mulot Den, tapi Den tak gigit takut mati, den komam ajo...akhirnya setelah berjaya membuat tangkapan yang kelimo....Den dibebaskan untuk pergi mandi dan salin pakaian....maso tu Dah maghrib.....Jam lapan ado sessi malam lak, dan kono jumpo mereko lagi......

Den pun masok leh ke bilik Den,....rupo-ruponya, kak bilik tu ada sorang lagi kawan Den yg baru jugo melapor....tetapi  dia datang awal pagi ahad tu, maso dio sampai tak ado oranglagi kat situ, mungkin semunya masih tidur lagi..jadi di duduk diam-diam kat bilik tu sampailaa Den datang. Dia kato dio  nampak Den kono salampengonalan tadi, dio jadi takut, dia tak berani nak keluar bilik....dari pagi sampai maghirib, dia duduk dalam bilik tu tak keluarx, dia minum air paip ajo, koncing pun kat singki bilik tu ajo...fuhhhhh padan laa bilik berbau semacam ajo bilo Den masok.......

Malam tu, jam 8 Den duo orang dah terpacak kek dewan makan .lebih kurang jam 8:30 baru ada senior Den masok, sorang demi sorang...Lauk malam tu nampaknya sodap jugo...tapi den tak leh makan sampai senior Den bonarkan...bila dia org suruh Den dan kawan Den makan, Den pun apo lagi nak melantak laa...rupo-ruponya, ado senior Den suruh tunggu dulu....disuruhnya tambah kicap laa, tomato sos laa, lado hitam kat nasi Den  dan kawan Den tu...punyolaa banyak kicap, tomoto tu, sampai nasi Den tu entah dah  jadi apox.....nak tak nak Den tolan jugo laaa.......Den joleng kawan Den yg duduk sebolah Den tu.....Den nampak air matonya mengalir ajo....Den sodih jugak, tapi Den ini org yang jonih susah nak sodihx....akhirnyo...nasi yg pelbagai raso tu abih jugo Den lantak...

Lopeh makan tu ada sessi pengenalan lagi..tapi Den tak leh nak cerito banyak pasal malam tu sobab, banyak isu yg sensitif.....tapi yang masih sogar ingatkan Den pada malam tu adalah, pada jam lobih kurang 2 pagi....kami dibori berehat dan berdiri di sekeliling senior-senior kami yang sodang gancak di bincangkan mereko. Sambil mereko berbincang, kami ditugaskan untuk mencatat segala perbualan mereka....selang 15 minit dia org suruh kami bacakan semulo.....Bilo dibaco semulo catitan tu...macam-macam yg keluar......maso tu semuo tergolak  bosa...termasuk Den...maklumlaa maso menulis dah ponek, kepalo poning, maso dah awal pagi....jadi apo yg dapek Den catitlaa...bilo baco semulo..lain lak yg keluar...Pendek cerito....malam tu Den failed sebagai seorang sekreteri........!

Dalam jam 4 pagi, kami dibonarkan balik ke bilik untuk tido...Den ingek lagi sebolom tidur, rakan Den tu, namonya  Asri (bukan namo sebonar) bagitahu Den..."Warith...aku tak tahan kat sini, aku tak nak jadi  komando, esok maso jumpo CO aku nak minta balik unit...Den tak cakap apo-apo ...cumo Den kato...."Kenapo tak sabar dulu, kita tengok dalam maso seminggu duo nie kalau tak leh pogi jugo....kita bueklaa keputusan....tapi Asri tak endah cakap Den. den ghaso dio dah nekad buek keputusan...Den pun raso tak sodap jugo dan ada jugo rasa bersalah....tapi bilomengonangkan omak Den dan orang kampong yg dah tahu Den masok komando...Denkorehkan hati  jugo.....apo Den nak kato dengan kekawan Den kalau Den keluar nanti....tak sanggup Den nak mengadap situasi tu....

Pagi tu sebolom terlolap.....Den dongar si Asri tu..menagis tersesak-esak...sayu jugo Den dongar...Tapi keadaan itu menguekkan lagi azam Den untuk jadi komando....sebolom terlolap....Den kato kat diri Den....Apo nak jadi-jadilah...Hidup nekad mati mudoi....Den totap dengan niat Den...nak jadi komando.....!!